زي ما وضحنا في المقالة اللي فاتت ان الميزانية هي: حسبتك للفلوس اللي بتكسبها وتوجيه الفلوس دي لتلبية احتياجاتك، سواء كانت احتياجات أساسية أو كماليات.

والحسبة دي هي أول خطوة في اتجاه عادات مالية جديدة بتخدم أهدافك، وعلشان تبني العادات دي محتاج تمشي على خطوات واضحة وبسيطة. يلا بينا؟

5 خطوات تعمل بيها ميزانية مظبوطة:

1- اعمل قائمة بكل التزاماتك ومصاريفك الشهرية:

اكتب كل حاجة بتصرف عليها فلوس خلال الشهر، من أول الالتزامات الأساسية زي الإيجار أو قسط البيت، لحد علبة اللبان اللي بتجيبها لما تكون زهقان.استخدم فواتير الشهر اللي فات، أو أبليكيشن البنك أو أي طريقة دفع إليكترونية بتستخدمها في الدفع، علشان تسهل عليك تفتكر تفاصيل المشتريات اللي فاتت.

2- فرّق بين المصاريف الثابتة والمتغيرة:

في الخطوة دي هتقسّم المصاريف الثابتة لوحدها والمتغيرة لوحدها.المصاريف الثابتة زي الإيجار، أو قسط ثابت، أو اشتراك في خدمة أونلاين مثلاً. لكن ايه المصاريف المتغيرة؟ بالضبط كدة، اللي بتتغير من شهر للتاني، زي مشتريات السوبر ماركت، والخضروات، والبنزين أو المواصلات، وفواتير الكهرباء أو الأكل من برة، وهكذا.

3- حدد أهدافك:

الطموح حلو مفيش كلام!
لكن الأحلى منه الخطة النظام اللي هيوصلك للهدف ده.

خد بالك من نقطة مهمة وانت بتكتب أهدافك وطموحاتك، هل الهدف ده داخل ضمن "الاحتياجات" ولّا "الرغبات"؟
ونقطة تانية بنفس الأهمية، هل الهدف ده قصير المدى ولا بعيد المدى؟
علشان نسهل عليك تطبيق الفكرة عملياً استعمل الجدول ده:

4- احسب صافي دخلك:

معظم الناس بتفضل تبدأ بالخطوة دي لما تيجي تعمل ميزانية، وده مش غلط، لكن ساعات ده بيوقفنا عند النقط دي وكأننا كدة عملنا الميزانية!
ده غير ان عشان تحدد صافي الدخل محتاج تتعرف على نفسك كمستهلك الأول، عن طريق انك تحسب مصاريفك الشهرية، اللي من ضمنها مصاريف ثابتة ومصاريف متغيرة، كمان علشان متبقاش "لحظة الحقيقة" دي تقييد ليك وانت بتكتب أهدافك وأحلامك.
ده هيساعدك تستخدم الأهداف دي كحافز ليك وانت بتلتزم بالميزانية قدام.

فكدة تقدر تاخد خطواتك الجاية على الأساس ده، علشان كدة رتبنالك خطوات الميزانية بالترتيب المنطقي.

فكدة تقدر تاخد خطواتك الجاية على الأساس ده، علشان كدة رتبنالك خطوات الميزانية بالترتيب المنطقي.

نصيحة فلاش: لما بتعرف صافي دخلك، بتقدر تستوعب حجم قوتك الشرائية بدون ما تنخدع بالرقم الإجمالي، وبالتالي هتتجنب "التبذير الأوڤر" أو الصرف الزيادة.

5- اعمل تعديلات وحط التاتش بتاعك:

دلوقتي انت قدامك المصاريف الثابتة والمصاريف المتغيرة، والدخل الصافي، وكمان الأهداف اللي عايز تحققها.
اعمل مقارنة بين الباقي من دخلك بعد خصم المصاريف الثابتة، وبين قائمة المصروفات الشهرية اللي عملتها في الأول.

وشوف النتيجة اللي طلعتلك محتاجة تعديل في أنهي جانب:

هل الإحتياجات الأساسية: دخل أكبر يكفي مصاريف البيت، أو تزود ميزانية الأكل الصحي، أو تسدد ديون واخدة نص المرتب لحسابها.
ولا الرغبات والرفاهيات؟ زي الأكل برة والسفريات وشوية شوبينج وهكذا.
ولا محتاج تركز على تحقيق الأهداف طويلة المدى زي انك تشتري بيت جديد، أو تدفع مدارس الأولاد، أو تعمل ماجستير، أو تبدأ بيزنيس صغير، أو حتى تعمل صندوق طوارئ.
وممكن تكون النتيجة اللي طلعتلك مكفية احتياجاتك ورغباتك، لكنك محتاج تبص لقدام و تعمل استثمار يزود قيمة فلوسك للمستقبل.

كدة الصورة بالنسبالك هتكون أوضح وهتعرف تحط لنفسك خطة ميزانية مناسبة لاحتياجاتك بالتاتش بتاعك.

بالشكل ده هيكون عندك صورة واضحة لمصاريفك، فهتعرف تحدد ايه الحاجات هتقلل صرف الفلوس عليها، وايه الحاجات اللي محتاجة تحط فيها فلوس أكتر.

المقالة الجاية >> ازاي التزم بالميزانية بتاعتي.

ازاي اعمل ميزانية؟